Il relasch digl enconuschent artist da Trun Matias Spescha (1925–2008) vegn conservaus e presentaus el SPAZI SPESCHA. Ella localitad (1000 m2) dalla anteriura halla industriala vegn seia ovra exponida en divers contexts duront stad ed atun.

Igl anteriur baghetg signuril e sut protecziun da monuments vegn reconstruius e nezegiaus sco casa da cultura, dedicada als renomai fegls da Trun: il pictur ed illustratur da cudisch d'affons Alois Carigiet (1902–1985) sco era a siu frar, il cabaretist e giugadur Zarli Carigiet (1907–1981).

La CASA hospitala DESAX duei cumpletar ed augmentar la purschida culturala da TRUN CULTURA optimalmein. Nus examinein pliras opziuns da diever, specialmein la mediaziun dalla litteratura romontscha, sco Caspar Decurtins, Hendri Spescha, Alfons Maissen ed auters, mo era da diever d'albiert e da residenza d'artists.

OGNA ei in'ovra unica cun gronda radiaziun e calamitad, scaffida digl enconuschent artist Matias Spescha (1925–2008), e plazzada en siu vitg natal. Tenor siu giavisch ei la pli gronda sculptura transibla en Svizra accessibla per mintginA sur onn da di e notg. Tgi che viseta OGNA, viseta era SPAZI SPESCHA.

Il Museum Sursilvan Cuort Ligia Grischa ei in dils pli bials baghetgs historics che croda en egl. El ei vegnius eregius igl onn 1679 sin incarica dalla Claustra Mustér e surveva sco casa communala dalla Ligia Grischa. La sala d'uopens, ni era sala da dertgira, ei siu cor. Ultra dalla historia sededichescha il museum era alla intermediaziun digl art local ed alla cultura populara.