A caschun dalla radunonza da fundaziun, ils 16 da schaner 2020, ha la suprastonza Trun Cultura incaricau ina cumissiun d'experts dad evaluar la realisabladad d'in center cultural da radiaziun naziunala a Trun. Duas premissas per questa incarica eran d'impurtonza:

Il «genius loci» culs enconuschents frars ed artists Alois e Zarli Carigiet mo era igl enconuschent artist Matias Spescha ed ulteriurs creaculturs duei survir sco basa e cuntegn per in disput digl art conform al temps e cun temas actuals.

Plinavon stevan all'uniun a Trun treis baghetgs a disposiziun, mintgin digns da tgira, per diever d'ina inscenaziun per in tal center: la ruina dalla casa paterna dad Alois e Zarli Carigiet, sco era la CASA DESAX, sut tgira da monument naziunal, e parts dall'anteriura fabrica da ponn.

La cumissiun d'experts ha presentau alla suprastonza ils resultats elaborai el decuors digl onn 2020. Il studi da realisabladad muossa il potenzial da TRUN CULTURA ord differents pugns da vesta e recamonda dad etappar il proceder. Ils 9 da schaner 2021 accepta la suprastonza las propostas e pren in'emprema decisiun da realisaziun.

La stad 2022 ha la nova cumissiun d'experts surluvrau sin giavisch da ses commembers externs ils concepts dil studi da realisabladad e ses projects parzials pragmaticamein, piorisond ina redimensaziun intenziunada e demussond las pusseivladads concretas dad etappar.

«Trun Cultura 2.0» munta da buca sefixar sin ina sligiaziun maximala senza cundiziuns, mobein d'entscheiver cun in process d'etappar che cuntegn las opziuns d'ina extensiun. Da principi dueien las realisaziuns esser funcziunalas, consistentas e simpaticas. Mo aschia sa l'idea fundamentala da Trun Cultura vegnir realisada cun success.

Quei agir, ch'ei vegnius acceptaus dalla suprastonza igl atun 2022, lubescha d'entscheiver immediat cun la tscherca dils mieds finanzials, d'in'entschatta prevesibla da construcziun ed en consequenza emprems resultats veseivels igl onn 2023.